MIKAANG NGAL (English War)

Kum 1824-1826 hun sung Mikaang ngamkeaute le Kawlngam a khat veina kisim a Rakhaing ngam le Taninthaye ngam teng Mikaangte khut nuai theng hi. 1852 kum ciang Mikaangte in a nii veina Kawlngam sim leleau a, Kawlngam thangsang teng Mikaangte khut nuai theng hi. A thum veina Kawl le Mikaang 1885 kum in kisim a, Kawl kumpi pa Thibaw Mikaangte in man a, ngamdang zot pui hi. Tua ahikom, 1 Jan. 1886 ni in ngam mong Kawl kumpi ii a bat ngawlna Zo ngam, Kachin ngam le Shan ngam ngawl buang Kawlngam bup Mikaangte khut nuai a theng suak hi. (1)

Mikaang ngamkeaute in Khamtung Zo ngam teng zongh laak tu in ngeal hi. 1887 kum December sungin, Captain Raike le a pawlte Kawlpi (Kalaymyo) hong theng a, Kawlpi khua le Kanbale sakteng ah phualsat in om uh hi. 14 December 1887 ni ciang, Mikaangte in Khuasak khua ah kamtai khat hong pai sak a,a kamtai pa in, “Mikaangte in no Sizang Hausate taw vaihawm khopna khat vawt nuam ahi ciang, zing ciang panin ni khaubawk hawm tawng i, ni khaubawk hawm ni (12) ni lian in no Sizang upate Kawlpi hong theng tavun. Mikaangte taw Kawlpi khua ah kikhawm in vaihawmna nei tu hi” ci in hong za sak hi.

Tua ni sia 26 December 1887 ni hi a, Khuasak pan Pu Hau Suang (71-19) lampui in, ama le Pu Thuam Son (97-19), Pu Do Suang (71-19), Pu Hong Son (243-20) le Pu Hang Kip (1-19) te Kawlpi ah kipai sak hi. Tua ni Kawlpi kikhopna ah Mikaangte in amate deina nam li ngen hi. Tua teng in;

1. Mikaangte ii Kawlpi uk tu in a koi U Pa Kyi sia lungkim pui in kip sak tu.
2. Kawlzaang sim in mihing a kipan khui le loai Sizangte ii a mat bulte seam nawn ngawl tu.
3. Sizangte ii Kawlte a mat sal in a khoai teng tha kik tu. 4. Sizang ngam kantan in Kawlpi pan India mawtaw lam vawt tu, tua sungah Sizangte in huuin panpui tu, ci thu teng ahi hi. (2)

Sizangte in a masa thu thum teng sia phamaw sa masa ngawlin Sizang ngam kantan in lampi vawt tu ci thu sia kiza thei vet ngawl hi. Mikaangte in “Kawlpi pan Khamtung kantan in lampi lian khat vawt nuam khu hi. Lam vawtna sungah no Sizang mite hong zangh nuam khu hi. Thaman hong pia tu khu hi, hong huu tavun” a ci ciang, Khuasak pan a pai Pu Hau Suang le a pawlte in, “Tu bang peuma in lam hong vawt heak vun. Ko Sizang mite sia mamaw mama lai ka hi uh ciang, lam vawtna ah kong suamlup siat tha tu uh lauhuai mama hi” ci in nial uh hi. Kawlpi ah a pai Sizang upa li teng Mikaangte in letmat khat tek pia hi. Inn a thet ciang a letmat piakte, a zite a tate in “doai thil”, ci in meikhuk sungah hal siat hi.

3 January 1888 ni in Falam Tashon Hausa teng taw, Angteng (Indin) ah kikhawm in lam vawt natu vaihawm leleau hi. Falamte in zongh Khuasak Pu Hau Suang te ii nial bangma in nial a, lam nong vawt uh le a liam a baai tam mama tu ahi ciang, ko hong heakpui ngawl tu khu hi, ci hi. Falamte taw a vaihawm zawkciang Hakha (Khalkha) te taw vaihawm lai tawng ci in 9 January 1888 ni in Hakha Zo khua ukpipa tungah kamtai thum pai sak leleau hi. Hakha Zo khua ukpipa in kamtaite thum manin, nii thatlum paih hi. Shwe Hlaing a ci sia pa suakta sak a, Arankan Hills sangah taisuak sia Kawl ngam ah a topa Captain Eyre omna khua Pagan theng kik thei luilam hi.

Hi teng zawk ciang, Khamtungte amate ngaisut bang hi ngawl ahikom tha thum bang khuangai a, April tha Kawlte tuibuak poai zawk bek ciangin, Sizang Hausa teng lai taw sam kik leleau hi. Tua lai in Khuasak Hang Kip sia Kawllai, Kawlkam Kawlte bangma in he zo hi. Sizang Hausa teng a sap hi kasap Hausate pai nuam ngawlin amate luangin, Khuasak Tau Kon tuu Thuam Son (97-19), Khuasak Khualvial tuu Hang Kip (1-19), Voklaak Hang Seal tuu Awn Kham (179-24), Buanman Daai Nuai te sila, Hatlangh, Hong Son (243-20), Limkhai Taapte sila Pau Thang (Kawlte) hi mihing nga teng pai sak hi.

Hi Sawltak teng Kawlpi a thet ciang, Mikaangte taw kisi in vaihawm uh hi. Mikaangte in ko le no sia u khat nau khat bang a om tu hi. Kikap ngawl tu hi. Nong kap uh le en vun ci in phah khat a tung lam in khai a, a ngalkapte kingual sakin bok lam in, phah a zaan niknek dongin kap cip sak hi. Nong kap uh le hi bangin kong vawt uh kul tu hi ci hi.

Hi sawltak nga teng a cia tu ciang, Sizang sung khua bangza pha nu ziam ci in dongh a, khua nga pha khu hi a ci ciang, tua khua ngate ii noptuam tu ci in, zam khap liat veu 5, puanvan 5, tungbeal 5 le hangkee ten 120 Mikaangte in letsong in ciapui sak a, tua teng Khuasak khua tun uh hi. Letsong teng Sizang sung teng ah kihawm hi. Hi bangin Mikaangte in letsong noptuam a piak uh sia ko Mikaangte le no Sizangte sia nam khat suak tu a, kido ngawl tu, kikap ngawl tu hi cina hi ci in vaitha hi.

Voklaak En Thuam (135-21) in a makpa Hong Son(243-20) Sawltak a Kawlpi a pai sia a nuai a bangin la phua hi.

* Ka ciin ngualkoai maimak lungdei leido kankong hong masa tee.
– Tong ciantel ngawl a, hawmtel shia thim lin piak in nei.

Khuasak Lam Son (253-23) ii zi Ciang Cingh (1-20) in a pa Hang Kip Kawlpi a a kipai sak a nuai a bangin la phua hi.
* Kaangtui dolun lim bang lian ee, laam bang muak tu, phungmang tangphung bang kalh ee.
– Phungmang sakluang khuam bang laihna pazua do taw ciam ve tee.

Sizang Hausate in Sawltak te tung nong vaithak uh, Mikaangte le Sizangte kikap ngawl tu, Sizangte in Kawlte sim nawn ngawl tu, a khui a loai nganhingte laak sak nawn ngawl tu, a zi a ta sila innteang in man nawn ngawl tu ci a, nong vaithak uh teng hi le hi nawn ngawl tu khu hi. Ahihang no Mikaangte sia ko Sizang ngam ah hong pai bale uh teh oai khu hi. Banghang ziam ci le no Mikaangte sia keal bangin kaang dikdek a, khat vei beak zongh hong mu ngei ngawl ka hi uh ciang, ka zi ka ta uh lau ngawpin thi tha tu hi. Tua ahiciang Sizang ngam ah hong pai heak vun ci in vaitha kik hi.

Sizang Hausate ii hi teng a ci ciang, Mikaangte in “Ko thu hong ni le uh teh kuama supna ngimna om ngawl zaw tu hi. Ko hong pai nuam thathong hi ngawl khu hi. Ka tungsia te in Khamtung en tu in hong pai sak hi. Kong pai uh ngawl a phamaw hi. No hong sia sak, hong lal sak tu hi ngawl khu hi. Falam ukpipa (Poai Ukpipa) taw kisi nuam kimu nuam hi bek khu hi” ci in thu puak kik hi.

Tasia ciang Khuasak pan Sizang Hausate in, “Mikaangte awng, nong pai nop uh sia nial zo ngawl tu khu hi. Poai ukpipa taw kimu nuam kisi nuam na hi bek uh le Poai sang paina Kawlpi pan ni tumna sangah lampi khat om hi tasia tawn tavun”, ci hi.

Mikaangte in, “Sizang sung ma kong tot ngawl uh in phamaw hi. Na zi na tate ii hong kiitak tu, na lau uh le Thangmual pan na khua paina lam uh na khak vun a, dialsan khat na khai vun. Tuak ah noma Sizang Hausa teng in hong ngak tavun a, koma taw Poai ukpipa kungah paikhawm tek tawng,” ci kik hi.

teng le sawltak teng taangpi taw Khuasak khua ah vaihawm in “Mikaangte thu hong piak kikna sia kampha hi ngawl hi, ei hong sia sak nuam hong lal sak nuam hi bale Poai lam zui a, kaato paih tu hi. Sizang lam pan ma kong pai nuam uh a ci hamtang nial thong sia, hong lal sak nuam, hong sia sak nuam ma hi tu hi. Kivei zo nawn ngawl tu hi. Ih do, ih kaa, ih mat ih thalup ma kul thong tu hi”, ci in Mikaangte do tu vaihawm uh hi.

A tung a bang do tu a vaihawm ciang, Kawlpi a pai sawltak nga teng in Mikaangte ih do suh ih do to hangin bangma hunin kizo ngei ngawl tu hi. Ei thau zakte din lam in a muk pan thal kul hi. Amate zakte a taw sang
pan thal hi a, din lam, to lam, baw lam in kithal thei papaih hi. Bangbangh a, baw lam thau kap theite sia din lam a kap thei bekte in zo thong tu hi ziam?. Tua bek dom ngawl, a thau sia tat peu ngawlin thal vazingh thei lai hi”, ci in nasia tak nial hi. Mikaangte ih do hang bangma hun kizo ngawl tu hi, ci in Kawlpi a pai sawltak te in a ci hang a dangte in um thei peuma ngawl hi. Thau tabang om ngei bo ci khawng a nial ngawp hi. Tasia ciang Ngal lampui pipa Pu Khai Kam (72-20) in, sawltak a pai te tungah thau te kap vazingh thei kale a peangpaak tungah kol a kibulh ziam?” ci sese hi. Sawltak a paite in a peangpaak nii tung ma kol hile kibulh hi, manlang tak pai thei tai thei thong hi”, ci leleau hi. Pu Khai Kam in peangkol tateng a pai thei a tai thei sia, Zaang ngam tengah a tai thei, a pai thei hi bek ngawl ziam? Khamtung liang lak keen lak pai thei tu na um na uh ziam?” a ci leleau ciang, mi honpi te in “Tabang peangkol kibulh sa hi po le, bang lau om tu ziam?” ci in Mikaangte do tu thukim thei tek uh hi. Sawltak te ii Kawlpi pai sia April 1887 sung hi a, December 1888 dong ma khat le khat kam kithak teng taw hun bo to hi.

30 December 1888 ni ciang Mikaangte Sir George White Kanbale khua theng a, Khamtung ah pai tu hi, keima lampui tu khi hi ci in kithoai in om hi. Mikaangte Khamtung pai tu in kithoai sa in a om zawk bek laitak, Mikaangte omna Kawlpi khua tatak ma Sizangte in sim suh hi. Tua ni ngal kisimna ah, Khuasak Kun Tong tuu Hau Mang (74-19), Khuasak Khum Thang tuu Lian Pau (65-20), Buanman Lian Sung tuu Son Awn (129-20), Thangnuai Khup Thang tuu Son Lam (78-20), Thangnuai Zil Om tuu Kim Lam (199-19) hi ngalhang nga te thi hi.

Mikaang ngalkap lubeam te (Gurkha) te hang mama ahikom, Kim Lam luang Sizangte in la zo ngawl hi. Mikaang ngalkapte in hong kan kik tu zam ci in Kim Lam luang Kawlpi luphung kil ah koi in aitaa na in nei a, ni sali tawntung pang hi. Tua huu in Kim Lam luang sia Sizangte in nga kik ngawl hi. Hi ngal simna sungah Mikaangte taw a kipawl Kawlte (17) Sizangte in man a, cia pui hi.

Pu Khai Vum (74-20) in a pa Pu Hau Mang thi hangin khat vei ciang ngal ai in a phulam kik thei a hina a nuai a bangin la phuak hi.

(1) Zuamang thaamna mealmakta aw, von balzal ah vul awng nge.
– Sawmsial phungcing zaalsak ing nge, zuamang minthei lo ing nge.

(2) Lenthang khuavui kaai nuai a leido zuapa na simlu in a mualkot tam kal sa’ng.
– Sakciang ka khua mualtung pan minthei kong law Zaangsi haungual dem na keak kilawm sa’ng.

Pi Za Ngiak in a pasal Pu Hau Mang thina le phulam in ngal a aih huuin kumpite ii liau a piakna a nuai a bangin la phuak hi

(1) Koaimang thaamna mealmak ta awng, sawn taw ciam a, na simlu khua mual sua nge.
– Sawn taw ciam a, khuamual sua ni sing ta’n laam bang veal ta ze.

(2) Sanglun simlu khua mual sua a thang zaw maw, mealma simlu khua mual sua a thang zaw maw.
– Mealmak simlu khua mual sua a thang ngawlin, sing in el a sesum tam see aw ci ze.

Thangnuai khua Pu Hang Suan (78- 19) in Kim Lam thina le a luang nga kik ngawlna la phua hi.

* Sawn aw khuei bang na han kom a, do dai nen ah vul awng nge.
– Phung lamh lailung muang maw ve cia, sen min phung taw na nunthum taw, pataang lap thiam taan awng nge.

Pu Hang Suan in Kim Lam le Son Lam ngalsim na ah a thikhop na a nuai a bangin la phuahi.

* Von ngeal taw paai va lo ing nge ka siallum in sung la zee.
– Ka siallum in sung la veng nge, von ngeal na khiakna hi ee.

Kawlpi Sizangte ii a sim zawk hai ngawlin, Mikaangte Kuailui vaal “Tuangthi” ah phualsat uh hi. A ngalvilte Phatzang dong thengto a, Sizang ngalvilte taw kisi in kikap paih hi. Ngalte in Buanman te khat thatlum hi. Sizangte in Mikaang ngal te Tulsuk dong del ahihang pha zo ngawl uh hi. Mithi luang pua in pawlkhat Buanman ah cia hi. Sizangte thin uuk in, a zing ciang kuan suh leleau a, Tulsuk ah Mikaangte taw kikap uh hi. Lubeamte ngal hang mama li Sizangte in that a, thau lawng li le laa “mules” li mat sak hi. Mikaang ngalkap a nungta lai teng Kawlpi dong taisuh hi.

Hi bangin ngal haksa sak ciang, Ngal lampui Khuasak Pu Khup Pau(72-19) le a inn teang pa Nga Nwa Tedim ah pai in, Suk Te ukpipa Khua Cin (210-11) tungah huu ngen hi. Khua Cin in ama uk sung tengah mihing khawm paih in, ngalkap 400 nga paih hi. Ukpi Khua Cin le ngalkap 400 teng Khuasak Pu Khup Pau inn theng a, Pu Khup Pau in a no sua zawk ni 25 a pha sialpui khat ngaw in Mikaangte do natu vaihawm uh hi.

__________________________________________________

(1) ျမန္မာ့လြပ္လပ္ေရးႀကိဳးပမ္းမႈသမိုင္း အပိုင္း (၁) (ရန္ကုန္၊ သမိုင္းဌာန၊ ရန္ကုန္ တကၠသိုလ္၊ ၁၉၈၈) စာ၊ ၁-၆၅
(2) Bertram S.Carey and H.N.Tuck, The Chin Hills Vol.1, (Aizawl: Firma KLM Private Ltd., Reprint 1976) p.22

Back to chapter 3

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: