REV. LAM CIN THANG General Secretary (1986-89)

Thuklai khua Za Mang tuu Pu Son Thawng le Pi Mang Dim te ii tapa hi a, 5 Sep.1944 ni in Thuklai khua ah piang hi. Sangkaa thei hun ciang BEHS Thuklai ah sang kaa kipan hi. 28 May 1961 ni in Rev. F. Ngo Khua Cin in tuiphum hi. 1964 kum Tedim pan tan sawm a zaw ciang University kaa suak a, 1968 kum in Yangon University pan B.A. (History) nga hi.

Yangon University pan sang a man ciang Sangsya (SAT) in tum a, 1969-1972 BEMS Hriphi, 1972-1975 BEHS Hakha, 1975-1978 BEHS Paletwa, 1978-1980 BEHS Tonzang cite ah seam hi.

Paletwa ah sangsya a sep sung 9 Dec.1975 ni in Jesu saang in nii vei suak kikna nei hi. Paletwa ah SAT ahihang Syapi vaipuak taw om ahikom sangpatang theampo ngupna a nga natu in sang assembly hall ngupna thusonna in zangh bul hi. Tua bek dom ngawlin khua 31 ah ngupna thuson in pai ngei hi. Tonzang ah a nasep sungin Tonzang Tuiphum Pawlpi taw kopin Pathian nasepna nei a, sangpatang RC pawlte zongh ngupna thu son pui a, RC Father pa zongh patau mama hi. Tonzang ngam khua 20 ah ngupna thusonna nei thei hi.

1980-1983 hun sung Union Biblical Seminary, Serampore Senate, India ah Lai Thiangtho sang kaa a, Bachelor of Divinity (B.D) nga hi. 1990 kum ciang ACTS, Korea ah D.Min. course sin a, 1990-1991 course work zo man bek hi. UTS/MIT Joint Programme MIT, Insein ah D.Min. Course kaa a, 2008 kumin zo hi.

2 July 1983 ni in Sya Ngo Thawng le Pi Dim Khua Man te ii tanu Syama Niang Pau taw kiteang hi. Tanu nii a nei uh te:-

1. Ms. Dim Huai Cing
2. Ms. Man Suan Huai

1983 kumin Thuklai Tuiphum Pawlpi ah hunbit Pathian nasep kipan hi. SRBA le ZBC ngam sungah panmun a laak ngeite a nuai a bang ahi hi.

1883- Associate Pastor – Thuklai Baptist Church
1984-86 E&M Director – SRBA
1986-89 General Secretary – SRBA
1989-90 Field Director – Chindwin Mission
1995-2001 AGS – SRBA (Part-time)
1992-2009 Senior Pastor – YSBC
2000-2009 Principal – ANTS (Part time)
2009- Principal – ANTS (Full time)

SRBA ah E&M Director a sep sungin Siyin Region Total Evangelization (SRTE) le Days of Challenge (DOC) kipat pui hi. 1986 kumin Taungdwinchaung le Tamu ngam Mintha ah mission nasepna kipan hi. A kikheal tam ma om ahihang Association khat vaan tu a haksat ciang ZBC te ii vaan tu ki aap hi. Kawlzang ah SRBA Pawlpi a pian natu a hanthawn pi khat hi a, Kalay Siyin Baptist Church (KSBC) le Tahan Siyin Baptist Church (TSBC) phuat hun in zongh om thei hi. ZBC Programme tatuam le Tedim ngam, Tonzang ngam sung mun tatuam te ah thusinna a khom khat ma pia ngei a, ama thusonna hangin thaa mangthang tampi te suatakna nga hi.

YSBC ah Pastor a sep ciang Myanmar Baptist Convention sung nasepna Committee tatuam te ah taangzai takin kihel thei a, MBC te in thusinna pia tu in sam bul hi. MBC in AD 2000 Mission sungah zangh mama ahikom zawna Poaipi a vawt ciang, Gold Cross Medal mihing (7) a piakna ah ama khat in kihel hi.

Sizang labu nei zawk natu in a vaihawm pi bel khat ahi ban ah Sizang Laithiangtho bu (Siyin Holy Bible) nei zawk natu in zongh Co-ordinator panmun taw ahi thei za in seam hi. Tua ban ah “The Reapers”, “The Siyin Baptist”, le YSBC pan Kawl lai taw a kivawt “The Book of Life” laibu te sua sakna ah Editor lampui pi dinmun panin maapang in seam hi. Ngupna taw kisai Kawllai taw ahizong Sizang lai taw ahizong laibu a khom khat ma a suak sak zo khat hi lai hi. “A Letter from Hell to You” laihawm sia Kawlngam sung om minam tatuam te ii kam a pheen kik in suak sak hi. Pawlpi sungah Sizang lai simbu le Church School laisin bu te zongh vaihawm in seam hi.

YSBC Pastor a sep sungin Mission Field (5) nei teng le Pawlpi sungah Mission Clinic nei zawk natu in vaihawm in seam hi. Sizangte in Shwe Siyin lo acre 200 nei thei natu in zongh a vaihawm khat ahi hi. 152, Bo Myat Tun Street, Botataung, YSBC Biakinn sia Lakh 500 taw tat zawk natu in zongh Committee te taw nasia takin hanciam in vaihawm hi.

Thu um mite ii panpuina taw Mission nasep natu “Dorcas Tailors Center” khat zongh vaihawm in hong ngei hi. AD 2000 kum ciang, ngamsung ngampua Thu um mite ii panpuina taw ma in All Nations Theological Seminary (ANTS) sang phuan a, tua sungah Principal sep taw thua hi.

Syapa Rev. Lam Cin Thang in ama ii nasepna le a mungtupna te a nuai a bangin pualaak hi. “A masa in Christ min a za ngei ngawl lai munte bek ah thuhilna nei tu sawm (Rome 16:20) ahitazong, Kawlngam bup ka thet ciang, a om sa Pawlpi te ah ngupna a kitel natu ka thin botna hong khang hi. Tua hi a, a minpu Tapidawte pianthak natu sia sep belin nei tu ka khensat hi. ANTS sang ahizong YSBC ah tha sim ngupna thu sinna ahizong ka vawtna sia hi thu hang hi bel hi. Topa ii nuntakna hong piak sung teng Ama minthan natu le a ngam zai natu ma, ka mungtup bel ahi hi.”

2 March 2005 ni in a it Syanu Niang Pau in Topa kung zot san ahikom a nusiat Syapa le a tanu te nii Building (2), Room (24), 51st Street Housing, Botataung, Yangon ah om uh hi

18 July 2008 ni in Pu Lt. Col. En Tual le Pi Cingh Neam te ii tanu thumna Nu Lian Kaang Cing taw pumkhat sua kiteenna Yangon Sizang Tuiphum Pawlpi ah Rev. U A. Ko Lay in neisak hi.

Back to Chapter 6

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: