REV. VUM KHAT PAU General Secretary (2007-2010)

Pu K.T. Ngo Za Lian le Pi Mang Za Cing ii ta lianbel hi a, 31 August 1963 ni in Khuasak khua ah piang hi. Tan lang Khuasak ah, tan khat pan tan thum Thuklai ah, tan li pan tan sali BEHS No.1 Tedim ah, tan liat Kawl Sizang khua ah, tan kua BEHS No.1 Kalay ah kaa a, 1981 kumin BEHS, Thuklai panin tan sawm ong hi. University of Yangon ah pilna sin zom a, 1985 kum in BA (History) nga hi.

University a kaa sung Jesu ngumpa in saang a, 3 April 1983 ni in Yangon Inya Lake ah Rev. Authar Kolay in tuiphum hi.

1989 kum ciang JAT thasum taw BEPS Darkhai ah PAT seam a, tha khat zawk ciang a za khangin BEMS Khumnuai ah
1989 pan 1992 dong JAT seam hi.

Sangsya sep sangin Pathian nasep tu uuk zaw ahikom 1992 kum ciang Myanmar Institue of Theology (MIT), Insein ah kaa a, 1997 kum ciang B.D. nga hi. MIT ah B.D. programme sia M.Div. in a kilaih ciang certificate theak a, M.Div. nga suak hi.

MIT ah a kaa hun sung Seminary Hill ah a kaa Ciimnuai mi teng Ciimnuai Innkuan a pian natu a vaihawmpi khat hi a, Ciimnuai innkuan ah Secretary (1994-95), Chairman (1995-96), Publication Chairman (1993-94, 1996-97) ci te seam ngei hi. 1996-97 Publication Chairman a sep sungin kumsim suak sak tu “Ciimnuai Khuavak Magazine” kipan in suak sak a, tu dong ma in kisuak sak hi. Tua ban ah sangkaa hun sung ma in Yangon Sizang Tuiphum Pawlpi ah WF te le YF te ii Choir Leader seam a, 1995 kum in Youth Chairman seam hi.

1 April 1997 ni in Tahan Baptist Church ah Pathian nasep kipan a, tua Pawlpi ah kum 2000 dong MF Director seam hi. 2000 kum ciang Yangon Siyin Baptist Church (YSBC) Youth te ii sapna hang le Sizang Lai Thiangtho vawtna ah lai zeam tu Computer leen tu khat a kisapna hangin YSBC ah Youth Pastor in tum hi.

YSBC ah a om sung Sizang Lai Thiangtho Committee sungah member khat hi a, Laithingtho a bu suak thei natu dong lai zeamin Computer taw seam hi.

4 April 2001 ni in Capt. Ngin Khua Mang le Pi Ngiak Khua Hau te ii ta nobel Nu Dim Thian Cing taw pumkhat sua kiteenna YSBC ah Rev. Lam Cin Thang in nei sak a, tanu Cing Khan Khai nei hi.

21-23 Feb. 2003 hun sung Kalay Siyin Baptist Church ah a kivawt A (27) Veina SRBA Kumcin Kikhoppi ah Ordain Pastor nga hi. 19-21 Feb. 2004 hun sung Tahan Siyin Baptist Church ah a kivawt A 28 Veina SRBA kumcin kikhoppi pan SRBA Associate General Secretary tu in kiteal a, SRBA zum ah SCLS Secretary, Accountant, SRBA-MC Jt.Secretary le CSSDD Vice-Chairman taw thua in seam hi.

SRBA ah a sep hun sung SCLS min taw Chin Christian Centenary tepteena kumsim suak tu Khuavak Magazine kipan in suak sak hi. Tua ban ah Sizang Laisim bu le Sizang kam taw ki at Nganhing tatuam ii lim vawt in suak sak hi. Hi SRBA Tangthu bu a pian thei natu in a phuangpi hi a, SRBA Tangthu Committee ah Secretary le a seam pi zongh ahi hi.

18-19 Nov. 2006 hun sung SCLS lampuina taw TSBC ah The First Siyin Literature Seminar and Music Concert vawtna pan Sizang Lai nasep natu Siyin Christian Community (SCC) kiphuan a, SCC Executive Secretary tu in kiteal hi. SCC pan laihawm NIKONGHONG ahizong, SCC Annual Magazine ahizong a vawtna ah Editor seamin maa panna nei hi.

1-4 March 2007 hun sung Limkhai Bungh ah a kivawt SRBA kum thum cin kikhoppi pan 2007-2010 term sung SRBA General Secretary tu in kiteal hi. SRBA ah MC Secretary, E&M Chairman, CSSDD Chairman, CDP Secretary ci panmun te taw thua in seam hi.

SRBA ah a sep hun sung Taingen Tuiphum Pawlpi ii ngetna le YSBC, SRBA ii oaina taw kizui in 2006 kum pan kipan Taingen Tuiphum Pawlpi ah Church Pastor seam hi.

2008 kum ciang Sizang sung hausa te le SRBA nasep khopna Siyin Region Development Programme (SRDP) ci in kiphuan a, tua sungah SRDP President seam hi. SRDP in 2008 kum sung Buanman le Bungh kilaklaw Jeep pai thei tu lamziik a, Fund zonna ah lampui in seam a, 27 Feb. 2009 ni in Buanman-Bungh Jeep lampi hon poai Ngatan luikhawm ah vawt pui thei hi.

SRBA E&M le EC te ii vaihawm lungkimna taw kizui in 2009 Sep. hun sung Singapore tawnin Malaysia ah E&M nasep natu survey vawtin pai hi. 2009 kumin SRBA-MC panin a kisuak sak “Tuicing Phaimit” Editor seam hi. 2009 sung SRBACE Department pan a kivawt Sizang Patang La No.1 DVD vawtna ah Director le Editor sep sak hi. Feb. 2010 in term cingin SRBA-GS pan tawlnga tu hi kale Khuavak Magazine Editor seam tu in SRBA in panmun aap lai hi.

Back to Chapter 6

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

%d bloggers like this: